Paikallisuutiset

Váldostivra lea válljen Eero Ylitalo ovttamielalaččat vt. gielddahoavdan

Váldostivra lea válljen ovttamielalaččat Eanodaga gielddahoavdda rabas virgái Eero Ylitalo. Ylitalo bargá vt. gielddahoavdda virggis eanemusat guhtta mánu dahje dassážiigo ođđa gielddahoavda álgá bargui.

– Dovdamušat leat hui buorit ja giitevaččat. Lokten gahpira mearrideddjiide, geat ovdagáttuid haga atne árvvus mu vásáhusaid agis beroškeahttá. Sii leat ovdagovvan olles almmolaš suorgái ja maiddái eará surggiide. Ovttamielalaš válljen addá buori vuođu doaimmahit dán barggu, Eero Ylitalo muitalii movttegit dakkaviđe mannan vahku čoahkkima maŋŋel.

– Lean hui iluin álgime fas bargui, ja jáhkán ahte mu vásáhusat dahket álkibun njuikestit mielde johtti togii.

Gielddastivrra ságadoalli Leena Palojärvi dagai váldostivrra evttohussii nuppástusevttohusa bálkká oasis. Son evttohii ahte Ylitaloi máksojuvvo ollislaš bálkán 8000 euro mánnui. Son ákkastalai iežas evttohusa Ylitalo guhkesáigásaš suohkanhoavda- ja luohttámušdoaimma vásáhusain, Eanodaga gieldda hástaleaddji diliin ja barggu mearreáigásašvuođain. Dasa lassin Ylitalo lea ahkepenšuvnnas, nu ahte eai leat nu ollu siidologut go olbmos gii ii leat ealáhagas.

– Loahpalaš submi báhcá vuollel dan supmi maid mii šattašeimmet máksit olbmui gii ii leat ealáhagas, cealká Palojärvi.

Su dorjo Jarno Viitanen, Ulla Keinovaara ja Helinä Hautamäki. Maiddái Elli-Maria Kultima lei Ylitalo válljejumi beales, vaikko imaštalaige Palojärvi dahkan bálkáevttohusa.

Hálddahushoavdan váldostivra válljii gielddastivrra evttohusa mielde Jussi Stoor. Stoor almmuhii juo stivrra čoahkkima áigge, ahte váldá virggi vuostá.

Dálá hálddahushoavda Marja-Riitta Aalto lea cealkán eret virggis, ja su bargu nohká guovvamánu loahpas. Hálddahushoavdda virgi lei rabas oktiibuot golbma geardde golmma sierra ohcanáiggiin ja daid áigge dohkálašvuođaeavttuid deavdi ohccit ledje oktiibuot logi ja dain jearahallojuvvoje čieža ohcci ja oasis sis jerre maid čálalaš barggu.