Paikallisuutiset

Lapha álggaha sámegielat lášmmohallanprográmmaid OnniTV:s

Sáddaga sáhttá čuovvut neahtasge.

Lappi buresbirgenguovlu buvttadišgoahtá OnniTV:a riikkaviidosaš sáddaga várás ahkeolbmuide oaivvilduvvon lášmmohallanprográmmaid buot golmma Suomas hubmojuvvon sámegillii. Goassege ovdal Suomas eai leat TV:s oidnon sámegielat buresveadjimii ja dearvvasvuođa ovddideapmái gullevaš prográmmat. Lášmmohallanprográmmat álget oidnot cuoŋománu 25. beaivvi rájes bearjadagaid dmu 11.45-12 OnniTV:s, mii lea dáid prográmmaid ovttasbargoguoibmi.

Lappi buresveadjinguovllu lášmmohallanprográmmat bistet kvártta ain hávális ja dalle hárjehallat mot sáhttá lášmmohallat čohkkut dahje čuožžut, ja maiddái mot sáhttá hárjehallat vuoiŋŋamaččaid. Prográmmat mannet davvisámegillii, ja dat leat tekstejuvvon nuortalaš- ja anárašgillii. Prográmmaid jođiha davvisámegielat fysioterapevta Aliisa Katainen, guhte bargá Sámi buresveadjinguovllus. Materiálat leat maid buresveadjinguovllu bargiid geavahusas, ja dat adnojuvvojit maid ávkin Lappi buresveadjinguovllu bálvalusain, ná čállojuvvo Lappi buresveadjinguovllu dieđáhusas. OnniTV lea suopmelaš TV-kanála, mii fállá ahkeolbmuide sihke gáidduslášmmohallama, muittu veajuiduhttima, kultuvrra ja áigeguovdilis sisdoalu. Lappi leanas OnniTV riikkaviidosaš sáddagat oidnojit antenna-tv:a kanálačujuhusas 36.

Dasa lassin OnniTV oidno Elisa, DNA ja Telia kábeltelevišuvnna kanálabáikkis 66 ja Ålcom guoibmeoperatevrraid kanálabáikkis 99. OnniTV riikkaviidosaš sáddaga sáhttá čuovvut maid čujuhusas onnitv.fi.