Paikallisuutiset

Näkkäläjärvi joatká sámedikki sátnejođiheaddjin

Sámi giellaráđi  ságadoallin doaibmá álgi áigodagas Ulla-Maarit Magga.

– Lea stuorra gudni válljejuvvot Sámedikki sátnejođiheaddjin. Erenomáš ilus lean das, ahte seamma stivra oaččui luohttámuša joatkit bures álgán barggu, cealká Sámedikki sátnejođiheaddjin ođđasit válljejuvvon Pirita Näkkäläjärvi.

Näkkäläjärvi joatká Sámedikki sátnejođiheaddjin doaibmabaji 1.9.2024–31.12.2027 áigge. Son válljejuvvui sátnejođiheaddjin ovddit háve ođđajagemánu loahpas ordnejuvvon ortniiduvvančoahkkimis.

Maiddái ođđajagemánus válljejuvvon várresátnejođiheaddjit ja stivra jotket barggusteaset, čállá Sámediggi dieđáhusastis. Sátnejođiheaddji Pirita Näkkäläjärvi lassin Sámediggi doalahii 1. sátnejođiheaddjin Leo Aikion ja 2. Várresátnejođiheaddjin eanodatlaš Tuomas Aslak Juuso.

Sámedikki stivrras jotket sin lassin Karen-Anni Hetta Vuohčus, Asko Länsman Ohcejogas, Tauno Ljetoff Anáris ja Inka Musta Helssegis.

Sámedikki ortniiduvvančoahkkin dollojuvvui čakčamánu 23.b. Sajosis, Anáris. Válgabaji vuosttaš čoahkkima rabai Sámedikki nubbin guhkimusat doaibman lahttu Anu Avaskari. Daningo guhkimusat lahttun doaibman Anne Nuorgam lei eastašuvvan čoahkkimii oassálastimis.

Avaskari loktii rahpansáhkavuorustis ovdan earret eará áigeguovdilis sámediggelága, ja sávai ahte sámediggelágain sáhtášii ovdánit.

– Ii leat geange ovdu, ahte mii leat dán boares lágas, mii ii šat doaimma iige otná beaivve bálval iešalddes riekta geange, Avaskari celkkii sáhkavuorustis.

Sámediggi meannudii čoahkkimisttis maiddá válgabaji doaibmaprográmma jagiide 2024-2027 ja dagai čoahkkimis maid eará válljemiid dán doaibmabadjái. Pirita Näkkäläjärvi muitala, ahte lea duhtavaš dasa, ahte sátnejođiheddjiid ja stivrra válggaid maŋŋel oaččuimet čoahkkimis guhkes ráđđádallanbottu maŋŋel ovttamielalaš ráđđádallančovdosa lávdegoddebáikkiin ja eará nammademiin.

– Dat hukse vuođu ovttasbargui loahppabadjái, Näkkäläjärvi muitala.

Eanodaga bealde Sámedikki doaimmas leat boahtte válgabajis máŋga ovddasteaddji.

Ealáhus- ja vuoigatvuođalávdegotti lahttun lea Nils-Johan Labba ja várrelahttun Juhán-Tuommá Magga. Skuvlen- ja oahppomateriálalávdegotti várrelahttun lea Laura Kotavuopio.

Sámi giellaráđi ságadoallin lea Ulla-Maarit Magga. Giellaráđi várrelahttun lea Inker-Anni Magga. Ulla-Maarit Magga doaibmá maid sosiála- ja dearvvašvuođalávdegotti várreságadoallin ja lahttun lávdegottis lea Tuomas Aslak Juuso.

Kulturlávdegotti várreságadoallin doaibmá Niko Valkeapää ja lahttun Iisko-Matti Näkkäläjärvi.

Nuoraidráđi lahttun leaba Rosa-Máren Juuso ja Niila-Juhán Valkeapää, ja várrelahttun Marielle Näkkäläjärvi.