Paikallisuutiset

Sámenuorat sávvet sámegielat nuoraideahkediid iežaset ruovttugiliide

De! 2 -prošeakta lea ordnen doaimmaid earret eará Gárasavvonis.

De! 2 -prošeakta lea kárten nuoraid sávaldagaid sámegielat astoáiggedoaimma birra, dieđiha Sámediggi. Gažadeapmái ožžo 97 vástádusa masa prošeaktabargit ledje earenoamáš duhtavaččat.

– Eanemusat nuorat sávve sámegielat nuoraideahkediid ja servvoštallama eará sámenuoraiguin, ja báikki gos sáhttet beare fal leahket, muitala prošeaktabargi Anni Saara Aikio.

Sámenuoraid miela miel áššit gažadeami vuođul ledje lihkadeapmi, árbevirolaš dáiddut ja olgun lihkadeapmi. Stuorámus oassi gažadeapmái vástidan nuorain sávvá, ahte doaimmat lágiduvvošedje sin iežaset ruovttugiliin. De!2-prošeakta leage juo doaibman čavčča áigge unnit giliin, ja leat dán rádjái leamaš Gárasavvonis, Vuohčus ja Čeavetjávrris.

– Golggot-skábmamánu áigge doaimmat lágiduvvojit viidát miehtá sámeguovllu. Áigot earret eará dolastallat, lágidit speallaneahkediid ja olgun lihkadeami. Ovttasbarggus Johtti Duodji -prošeavttain ordnejuvvo Avvilis liidneriessunkursa. Dan lassin leat pláneme mátkki Kárášjoga ja Guovdageainnu duodjemárkaniidda, muitala Aikio.

Sámedikki nuoraidráđđi lea ožžon nuoraidbarggu ovddidanprošektii ruhtadeami Lappi guovlohálddahusdoaimmahagas. De! 2 -prošeakta ollašuhtto boahtte jagi lohppii ovttasbarggus sámeguovllu gielddaiguin, Sámi oahpahusguovddážiin ja nuoraidguovddáš Vasatokkain.