Paikallisuutiset

Suopma ja Ruoŧŧa čavgejit bolesovttasbarggu rádjeguovlluin

Soahpamuššii gullet mearrádusat hohpolaš doaimmaid birra mat galget čađahuvvot dalle go daid bivdá dahje go ii bivdde.

Suoma ja Ruoŧa gaskasaš rádjeguovllu bolesovttasbarggu guoski soahpamuš beavttálmahttá dorvvolašvuođa bajásdoallama davi rádjeguovllus. Soahpamuš muddejuvvo Suomas Eanodaga, Kolari, Muoná, Bealdu, Durdnosa ja Badjedurdnosa gielddaid guovlluin, ja Ruoŧas soahpamuš guoská Háhpáránddi, Girona, Bájila ja Badjedurdnosa gielddaid guovlluid.

Presideanta Alexander Stubb dohkkehii soahpamuša Suoma dásseválddi ráđđehusa ja Ruoŧa gonagasválddi ráđđehusa gaskka rádjeguovllu bolesovttasbarggus bearjadaga miessemánu 17. beaivve. Seammás presideanta maiddái nannii lága daid gaskkas dahkkojuvvon soahpamušas. Soahpamuša ulbmilin lea beavttálmahttit almmolaš ortnega ja dorvvolašvuođa bajásdoallama sihke rihkkosiid eastadeami, čielggadeami ja dutkama rádjeguovlluin.

Suopma ja Ruoŧŧa vuolláičálle riikkasoahpamuša rádjeguovlluid bolesovttasbarggus juo jagi 2021. Lágat bohtet fápmui láhkaásahusain mearriduvvon áigge.

Soahpamušas lea jearaldat ođđalágan ovttasbarggus Suoma ja Ruoŧa bolesiid gaskkas, go riikkaid gaskkas ii leat ovdal leamaš guovttebeallásaš soahpamuš bolesovttasbarggus.

Soahpamušas leat mearrádusat bivdagiin ja bivdaga haga ollašuhttojuvvon hohpolaš doaimmain. Goabbáge dilálašvuođas nuppi riikka virgeoapmahaš sáhttá rasttildit ráji ja čađahit doaimmaid dušše dalle, jos lea sáhka dakkár duođalaš rihkkosis, mas lea sáhka olbmo heakka, dearvvašvuođa dahje áitta fysalaš guoskameahttunvuođa birra. Dakkár roavva rihkkosat leat ovdamearkka dihte veagalváldin, roaves illasteapmi ja heaggavahágat.

Soahpamušas dárkkuhuvvon veahki addin lea eaktodáhtolaš. Veahki ii sáhtáše ovdamearkka dihte addit dalle go leat gávdnomis bolespátrulla. Dasa lassin galget dakkár bolesat beassat doaimmahit bargguid, geat leat eaktodáhtolaččat ohcan sullasaš skuvlejupmái ja addán ovddalgihtii lobi doaimmahit dakkár bargguid.