Paikallisuutiset

Suoma ja Norgga sámedikkiid oktasaš prošeakta Duodji Akademiija álggahuvvo

Plánejeaddjin lea aitto álgán gilbbesjávrilaš Birit Tornensis.

Suoma ja Norgga sámedikkiid ovttasbargun čađahuvvo Duodji Akademiija 2027 nammasaš prošeakta, man váldomihttomearrin lea ovddidit ja bajásdoallat sámi duodjemáhtu sámeservošis. Seammás dan mihttomearrin lea nannet árbevirolaš sámeduoji máhtu ja sajádaga, dorvvastit árbevirolaš dieđu ja dáidduid sirdáseami nuoraide. Áigumuššan lea maid buoridit oahppomateriálaid ja digitála reaidduid oažžuma. Dasa lassin prošeakta geahččala ovddidit sámeduoji gánnáhahtti ja suvdilis ekonomalaš ealáhussan. Prošeavttas ráhkaduvvo doaibmaplána ehtalaš rávvagiiguin, mat sisttisdollet sámeduoji buvttadeami, vuovdima ja geavahusa, ja sámi árbevirolaš dieđu dorvvasteami, dieđiha Suoma sámediggi.

Prošeavtta plánejeaddjin lea čakčamánus álgán Gárena-Biera Biera Juha Biret, Birit Tornensis. Gilbbesjávrilaš Tornensis muitala iežas ráhkistit duddjoma. Son lea studeren sámeduoji sámiid oahpahusguovddážis Johkamohkis Ruoŧas, ja sus lea humanisttalaš diehtagiid kandidáhtaskuvlejupmi ja sus lea maid buohccedivššárskuvlejupmi.

– Álggán bargui movttegis mielain. Prošeavtta fáddá lea hui dehálaš ja munnjenai earenoamáš miellagiddevaš, go lean ieš maiddái sápmelaš duojár. Lea somá buori teamas beassat bargat dáinna fáttáin, dadjá Tornensis, gii bargá gáiddusin Gilbbesjávrris.

Prošeavtta fáddá lea hui dehálaš ja munnjenai earenoamáš miellagiddevaš, go lean ieš maiddái sápmelaš duojár.

Prošeavtta doaibma deattuha árbedieđu sirdima ealáskahttima ja nannema lunddolaš birrasis. Prošeakta lágida bargobádjesemináraid Eanodagas, Guovdageainnus ja maid Ruoŧa beale Gárasavvonis. Dáid semináraid fáddán leat ee. árbedieđu gaskkusteapmi buolvvas nubbái. Seminárain fállet nuoraide, duojáriidda, servviide ja organisašuvnnaide vejolašvuođaid studeret duodjedáidduid, juohkit jurdagiid ja ságastallat sámeduoji boahttevuođas.

Prošeavttain geahččalit doarjut maid rájiid rasttildeaddji ovttasbarggu Norgga ja Ruoŧa sámeduodjeinstitušuvnnaiguin ja sámeduojáriiguin. Dan mihttomearrin lea maid nannet sosiála oktiigullevašvuođa ja kultuvrralaš identitehta ja sámegiela.

Prošeakta ruhtaduvvo EU Interreg Aurora -prográmmain, ja Lappi lihtus lea ohccojuvvon álbmotlaš vásttaruhtadeapmi. Prošeakta joatkašuvvá jagi 2027 lohppii.