Paikallisuutiset

”Sin ánssus lea ahte mis odne alitruossaleavga libarda leavgastákkus”

Eanodagas ávvuduvvui dán jagi iehčanasvuođabeaivi árvvolaš doaluin.

Ipmilbálvalusa loahpas gielddahoavda Eero Ylitalo vulggii sáŋgárhávddiid lusa oktan kránssa guddiiguin gos gudnevákta leige juo sin vuordime. Ylitalo dieđuid mielde soahtešiljus boahtán jápmaságaid dolvo Eanodaga ássiid ruovttuide 35 geardde.

– Juohke jápmasága mielde nohke niegut, boahtteáigi rievddai ja moraš devddii olbmuid váimmu, man ii sáhte sániiguin čilget. Sin ánssus alitruossaleavga libarda dál min leavgastákkus dáppe odne, muittuhii son.

Ylitalo muitala, ahte sáŋgárhávddiid boares hávdeeatnamis leat bissovaš muitomearkkat das, ahte friddjavuohta ii leat diehttelas.

– Min bargun lea doalahit dan muittu ealli muitun, ii dušše sániiguin muhto maiddái daguiguin. Ráfi huksen, beroštit nubbi nuppis ja servoša doarjun leat dat barggut maiguin sii sihkkarit sávaše min joatkit.

Ahte sii fievrridivčče dan viidáset vai mii eat vajálduhtáše sin geat rahče min iehčanasvuođa ovddas.

Kránssaid bidjama maŋŋel manne searvegoddevissui ávvudeapmái, man rabai gieldda váldostivrra ságadoalli Jarmo Näkkäläjärvi.

Näkkäläjärvi bivddii, ahte buohkat galggaše fuolahit das, ahte iehčanasvuođabeaivái gullevaš jaskes diehtu sirdašuvašii ođđa sohkabuolvvaide.

– Ahte sii fievrridivčče dan viidáset vai mii eat vajálduhtáše sin geat rahče min iehčanasvuođa ovddas. Son fuomášuhttá, ahte Eanodagas eai leat šat soahteveteránat, muhto giittii sin goitge. Sáhkavuorustis loahpas Näkkäläjärvi logai vearssa Pertti Mäenpää divttas Kuudes joulukuuta (sám. Guđát juovlamánu):

– Din haga, geat lehpet ceavzán doppe muhtin báikkis, de mii dál humašeimmet amas giela. Sin haga, geaid ruossat leat dahkkon muoras, livččii árgabeaivi juovlamánu 6. beaivi.

Dilálašvuođa ávvusártni doalai Jan Wahlberg. Su ledje bivdán hupmat doaivaga birra.

Wahlberga mielas doaivva gáibida daguid, iige sáhte navdit, ahte áššit dáhpáhuvvet dušše danin go mii dan sávvat.

– Niehku báhcá niehkun jus dušše sávat, itge aktiivvalaččat bargga áššiid ovdii. Doaivva lea fápmu, mii doalvu ovddosguvlui, ja mii ovddida daguid.