Paikallisuutiset

Siida boahtá Verddevahkkui Eanodahkii

Sámemusea Siida lea eanet maid go dušše musea Anáris. Dan kulturbirasbálvalusat vástidit ovdamearkka dihte sámi ruovttuguovllu arkeologalaš kulturárbbi, huksenárbbi ja eanadaga áššedovdibarggu, nugo lávvemii, huksemii ja eará eanangeavaheapmái guoski cealkámušain ja dárkkistemiin, sámeguovlluin gávdnon dávviriid ja gávdnosiid vuostáiváldimis ja divodanrávvagiin.

Huksenárbeáššiin sámeguovllu ássiid bagadallaba restaurerenmeašttir Marko Korkeasalo ja amanueansa Miina Tolonen. Sudnuide sáhttá váldit oktavuođa ságastallamii muhto maid oažžun dihte rávvagiid, muhto soai maid veahkeheaba iešguđetlágan huksenárbevirrui gullevaš ruhtaohcamiiguin. Bálvalus lea nuvttá kundariidda, ja gánnáha váldit oktavuođa áššedovdiiguin juo jurdda- ja plánenmuttus.

Arkeologa Juha-Pekka Joona ja intendeanta Eija Ojanlatva leaba gieddebarggus Eanodagas duorastaga rájes bearjadahkii, čakčamánu 2.–5. beivviid. Oassi báikkiin, mat galget dál iskojuvvot, gullet ođđa huksenbáikkiide ja oassi dain gullet báikkiide, maid báikkálaš olbmot leat gávdnan.

– Munnuide gánnáha váldit oktavuođa, jos eahpidat leat gávdnan dakkár dávvira, mii lea badjel čuođi jagi boaris dahje dološ olbmuid guođđán luottaid luonddus, omd. bivdorokkiid, geađgeráhkkanusaid dahje dološ goahtesajiid, rávve Joona.

Son muittuha, ahte gánnáha govvet gávdnosa ja dan dárkilis gávdnanbáikki, ja dárbbu mielde merket gávdnanbáikki eatnamii.

Ojanlatva dadjá, ahte almmuhusa sáhttá dahkat juogo Musealágádusa dieđihan- ja máhcahanbálvalussii Ilpparii dahje njuolga museai.

– Mii dárkkistit báikki nalde gávdnon gávdnosiid milloset álo ovttas dávviriid gávdnan olbmuiguin, lasiha son.

Verddebeivviide musea bealis searvá maiddái Virtuála Sámi eana (VISA) -prošeavtta koordináhtor Konsta Verta. Son ovdanbuktá kulturbirrasiin ja sámedávviriin dahkkojuvvon 3D-málliid, mat leat dahkkojuvvo dán prošeavtta olis.

– Mii háliidivččiimet erenomážit gullat, maid Eanodaga ássit jurddašit prošeavtta bohtosiid birra, ja makkár boahtteáiggi sávaldagat báikkálaččain leat kulturbirrasiid 3D-skannemiid ektui, Verta muitala.