Paikallisuutiset

Sámediggi jugii ministeriija mieđihan stáhtadoarjaga sámekultuvrii

Sámedikki kulturlávdegoddi jugii kulturlávdegotti čoahkkimis guovvamánu beallemuttus oahpahus- ja kulturministeriija dán jahkái mieđihan stáhtadoarjaga oktiibuot 222 000 euro. Doarjagat juhkkojuvvojit sámegielat kultuvrra ovddideapmái, davviriikkalaš sámeservviid doarjumii ja sámegirkostobuid fuolaheapmái.

Johtti Sápmelaččat oažžu dán giđa Heahtá Márjjábeivviid lágideapmái prošeaktadoarjaga 5500 euro. Johtti Sápmelaččat oažžu maid sámeservviid doaibmadoarjaga 2 500 euro.

Eanodagasnai doaibmi Sámi Duodji ry oažžu servviide dárkkuhuvvon doaibmadoarjaga 23 000 euro.

Kulturlávdegoddi jugii doarjagiid maiddái lunddolaš olbmuide. Lauri Marjakangas oažžu 2000 euro prošeaktadoarjaga lágidit dánjagáš Heahtá musihkkabeivviid oktavuođas konseartta. Antti-Oula Juuso bealistis oažžu 1000 euro bargostipeandda girjji čállimii boazosápmelaččaid eallimis, ja Birit ja Reetta Tornensis oažžuba 1 200 euro prošeaktadoarjaga "Suttuheapmi"-nammasaš bivttasčájáhusa plánemii.

Buot buohkanassii sámedikki doaimmahahkii bohte 80 ohcamuša sámegielat kultuvrra ovddideapmái ja sámeservviid doaimmaid várás. Doarjagiid ohce oktiibuot sullii 482 600 euro ovddas.