Paikallisuutiset

Ristenrauna Magga: "Dát váikkuha min álbmogii jus eai gávdno bálvalusat”

Pirita Näkkäläjärvi mielas sámedikkiin livččii galgan váldit oktavuođa álggu rájes juo, vai sápmelaččaid vuoigatvuođat seillošedje.

– Sode galggai dorvvastit dásseárvosaš bálvalusaid olles riikii. Dáthan čuohcá dán paragráfa vuostá. Dás lea ovttaveardásašvuohta guhkkin eret. Dát lea SámiSoster rs guhkesáigásaš beaivválaš jođiheaddji Ristenrauna Magga diehtu Lapha mearrideddjiide gulahallandilálašvuođas, man Lappi buresveadjinguovlu lágidii Anára ja Ohcejoga olbmuide.

Gáiddusoktavuođas dilálašvuhtii oassálastán Magga muittuhii, ahte Lapha strategiijas gávdno oktan váldočuokkisin árgga dorvvolašvuohta. Plána áigumuš loahpahit Avvila dearvvasvuođaguovddáža birrajándora beaivválaš fáktavuoruid eai su oainnu mielde mange láhkai nanne olbmuid árgabeaivvi oadjebasvuođa dovddu.

– Sámi mánnábearrašat fárrejit eret. Dát váikkuha oba min álbmogii, dannego dáppe eai leat bálvalusat. Olbmot eai boađe deike eaige báze deike orrut. Eai nuorat háliit máhcat deike maŋŋel studerenáiggi. Bivddášin din guorahallat ja rievdadit daid din bassi plánaid, doarjalii Magga.

Son muittuhii seammás, ahte juobe smávva skuvlamánát sámeguovllus leat čuvvon Lapha-ságastallama ja sin gaskkas badjánii gieskat fuolla das, ahte mot de geavvá, jos sidjiide geavvá juoga iige doavttir leat obanassiige olámuttos.

– Jurddašehket dal virgeolbmot jierpmálaččat. Dii boahtibehtet deike plánet Roavenjárggas ja Giemajávrris, gos bálvalusat, bálvalusaid dárbbut ja dilálašvuođat leat earáláganat, himáhalai Ristenrauna Magga. Son fuopmášahtii sáhkavuorus loahpas, ahte Nato-miellahttovuohta lea mielddisbuktán, ahte sihkarvuođafáttás hubmojuvvo hárve dan beaivve: Datge lea maid sihkkarvuođaášši, iige mihkkege unnit. Áiggun loktet ášši ovdan maiddái Helssegis boahtte vahku boaittobeale báikkiid forumis, Magga dáhkida.

Sode galggai dorvvastit dásseárvosaš bálvalusaid olles riikii. Dáthan čuohcá dán paragráfa vuostá. Dás lea ovttaveardásašvuohta guhkkin eret.

Sáhkavuoru gáiddusin doalai maiddái váhnenfriddjavuođas leahkki Sámedikki ságadoalli Pirita Näkkäläjärvi. Su mielas orui leamen nu ahte Lapha livččii vajálduhttán váldit vuhtii dan, mot čuohppamat sáhttet garrasit čuhcet sámeguvlui.

– Buot lágaid ja riikkaidgaskasaš vuoigatvuođaid mielde sode-bálvalusat galget dorvvastuvvot ovttaveardásaččat sápmelaččaide ja sámegielagiidda, muittuhii Näkkäläjärvi.

Näkkäläjärvi muitala, ahte ovdamearkka dihte Njuorggámis lea bigálusaid áigge guhkes mátki Roavenjárgii. Ja jus bárttáska, de sáhttá leat nu ahte ferte johtit seavdnjadas ja maid dalle go lea njalkkas siivu.

– Oppalohkái go ovttaveardásašvuođa smiehtada, de sode-ođastusa oktan vuolggasadjin lei, ahte ovttaveardásašvuohta buoriduvvo. Dát ii duođaid buorit ovttadássásašvuođa ovttainge dáppe davvin.

Näkkäläjärvi fuopmášuhtii olmmošlaččat, ahte jus árvvoštallanjoavku ja Lapha livčče vajálduhttán ášši, de sápmelaččaide gullevaš áššiin áššedovdamuš gávdno Sámedikkis. Su mielas lei juo álggu rájes galgan váldit oktavuođa Sámedikkiin vai sámi vuoigatvuođat livčče bisson mielde.