Kolumnit

Peltoniemen Johaneksen joulupakina: Muoniossa olit ensimäiset tiernapojat jouluna 1948

Vasta olheen sovan takea meän muut varustheet olit sotasia.

Ko Muonion oppikoulu alotti toiminan vuonna 1948, sen ensimäiseksi rehtoriksi valithiin Oulussa syntyny Visapään Irma. Soli lapsesta asti tottunut siihen, että aina joulunaikana esiinyit tiernapojat. Muoniolaiset ei vielä sillon tuntenheet tiernapoika-näytelmää. Jokku olivat ratiosta kuulheet jotaki tiernapojista, mutta suurimalle osalle soli aivan outo asia.

Lokakuussa 1948 yhen oppitunnin jälkheen Visapää kerto meille oppilhaille tiernapojista ja sano perustavansa Muoniihoonki tiernapojat. Soli jo etukätheen valinu tiernapoikanäytelmän esitäjät.

Olima koonheet sotilhailta jäänheitä pistimiä, miekkoja ja kypäröitä.

Minun soli valinu kuninkas Heroteksen roohliin, minun serkun Kaarlo Anttilan Mustien Murjaaniksi, Veikko Lundvallin Knihtiksi ja Jouni Pietikäisen Mänkiksi. Tämän jälkheen meillä alkoki monen viikon aikana roolitten oppiminen ja tiernapoikavarustheitten tekeminen koululla Visapään asunossa.

Jokku pojista tehit meile suuren tähen ja opettajat tehit jokamiehen lakanakankhaasta pitkät tiernapojitten paiat. Vasta olheen sovan takea meän muut varustheet olit sotasia. Olima koonheet sotilhailta jäänheitä pistimiä, miekkoja ja kypäröitä. Niitä oliki sillon paljon joka paikassa. Niitä tarvithiinki tässä esityksessä.

Ko molima oppinheet omat osat ja saahneet eshiintymisvaatheet alotimmaki esitykset.

Nekki hyväksyit meän esityksen ja yhyit lopuksi kauvon kestänheishiin aplootheihin.

Muoniossa oli järjestetty vuositten aikana maatalousnaisten ja muittenki yhistysten kans yhtheisiä joulujuhlia, joissa oli monenlaista perintheistä jouluohjelmaa. Tiernapojat kuttuttiin kans mukhaan ja sanothiin, että meän esitys sopis hyvin juhlan viimisenä numerona. Se sopi meile.

Meät otethiinki hyvin vastaan. Innokhaasti lauloima ja kerroima joulun sanoman: ”On lapsi syntynyt meille ja Poika annettu on. Hänessä elämän löysin, Jumalan suosion.”

Juhlassa oli aina paljon vanhempaa väkeäki. Nekki hyväksyit meän esityksen ja yhyit lopuksi kauvon kestänheishiin aplootheihin.

Peltoniemen Johanes