Mielipiteet

Kari Koivumaan mielipide: Vanhus miettii

Jaa, taitaa se ruoantuoja kohta tulla, häätyy mennä ovi aukasehmaan! Ei sitä tohi ovea pittää auki päiväläkhään, ko kaikenlaista hiipparia liikheelä.

Se hyvinvointialue lopetti multaki se tuetun ruokapalvelun, hääty minun itte tilata se ruoka nyt ruokapalveluyhtiöltä, täyshinta häätyy ny maksaa. Ennen soli seki paremmin ko oli kunnan hommia tuo ruokapalvelu, tuothiin ruoka viitenä päivänä viikossa. Nyt se tuohhaan kahtena päivänä viikossa viien päivän ruoka, kylmänä tuohhaan ja eikä sitä ehitä lämmittähmään. Häätyy itte lämmittää ja yksin syöä. Se ruoantuojaki on nyt niin kiihreinen, että ei se ehi ko muutaman sanan vaihtaa.

On se hyä hommma, että mulla tuo poika assuu lähelä ja käypi minua melkein joka päivä kattomassa. Sanoppa sie jos mulla ei olis lapsia niin kukas minusta huolehtis, en mie yksin ilman apua pärjäis.

Se tulis kyllä äkkilähtö Tanhaan, joutus jättähmään oman koin! Mutta mie kuulin, että Tannassaki täyttä ja Palvelutaloltaki viethiin yöpäivystys pois, että nyt sielä sitten asukhaat oman onnen nojassa. Ei sielä kyllä kovin kaksista olis.

En tiä, miten ne lapset ehtii kattohmaan, ko henki lähtee.

Ihmeellistä hommaa noitten hyvinvointialueithen pomojen tekemiset, net päätti, että ei tarvita Kolarissa vueosastoa, hoiethaan saihraat kotona ja jos oikein hätä niin laittavat sängyn Tanhaan. Nyt ko ei vielä ole Tannassa vappaata tillaa, eikä sitä uutta palvelutaloa Kolarissa, niin viehän minukki naapurikunthaan tarkkaihluun. Ja jos sattuu että mie en toivu, niin sielä kuulema hyät saattohoitajat. En tiä, miten ne lapset ehtii kattohmaan, ko henki lähtee. Saattaa olla, että yksin se lähtö sitten tullee.

Siivous vissin häätys tilata, ko kolme kerrosta talossa ja ikkää jo yli yheksänkymmenen, mutta seki tietekki häätyy itte maksaa omasta eläkheestä. Häätys niitä kotipalvelun ihmisiä tilata, jos ei lapset ehtis käyhmään ja hoitahmaan minun asioita.

Mie olen kuullu, että ei ne hoitajat ehi yhessä talossa kauaa olehmaan. Laittavat lääkheet tosethiin, kattovat miten asiakas voipi ja tekevät sen, minkä ehtivät. No onneksi mie itte pystyn vielä käyhmään suihkussa ja syöhmään ja ottahmaan lääkheet ja lapset ko auttaa ja käyvät monasti viikossa, niin en mie paljoa hyvinvointialueehlta pyyäkhään!

Tullee kuulemma niin kalhiiksi meän vanhusten hoitoki, että miepä yritän tässä pärjäilä, tuntuu kyllä välistä, että olema semmosta roskasakkia, josta pittäää äkkiä päästä erhoon.

Häätys tietekki sen ropotinki välistä lattautua, että taas jaksais touhuta 7/24.

Nyt ne suunnittellee semmosta etäkotihoitoa ja etäsaihraanhoitoa. Minunki koista tulis semmonen kotisairaala. Tänne tulis vissin semmonen tietokone pöyäle, josta ne minua vahtis ja antas ohjeita, mitä häätyy tehä.

En mie tiä, kuka minua kävis nostamassa, jos sattusin kaatuhmaan tai en jaksais nousta sängystä. Häätys vissin tilata taksimies nostahmaan, ko pittää se vessaanki välistä päästä. Tai sitten ne laittaa mulle vaipan, sinne se häätyy tarpheet tehä, käymä ko ehimä!

En mie kyllä ossaa tietokonetta käyttää, häätys olla semmonen ropotti, joka minua passais ja laittais konheet pellaahmaan. Häätys tietekki sen ropotinki välistä lattautua, että taas jaksais touhuta 7/24. Ja ehkäpä se etähoitaja pyörähtää kerran viikossa minua kattomassa, häätyy tietekki saaha lupa isolta päälliköltä.

Jaa se näkkyy poikaki ajavan pihhaan, nousee autosta ja ruokakassi käessä. Se tuli laittahmaan viikon lääkheet tosettiin ja kattohmaan että pannu pellaa, tarkistahmaan että muori on kunnossa ja että postiki haettu.

On se hyä, että tuli aikahnaan tehtyä noita lapsiaki, niissä son minunki vanhuuen turva, valtio unohti, lapset ei.

Mökin Mummo

Kari Koivumaa mökin mummona

Kirjoittaja on Kolarin kunnanhallituksen ja kunnanvaltuuston jäsen (kesk.).