Paikallisuutiset

De! 2 lágida sámegielat astoáiggedoaimma nuoraide sámeguovllus – doaibma plánejuvvo nuoraid sávaldagaid vuođul

Nuoraid sávaldagat kártejuvvojit skovvejearahallamiin masa sáhttá vástidit čakčamánu 8. beaivvi rádjái.

Sámedikki ja sámeguovllu gielddaid oktasaš De! 2-fidnu lea álgán. Prošeavtta áigge lágidit 13–29-jahkásaš sámenuoraide astoáiggedoaimmaid sámegillii sámekultuvrra vuođul. Seammás sámeguovllu gielddain dorjot sin identitehta, searvevuođa, ovttaárvosašvuođa ja dásseárvvu.

Prošeaktabargin lea válljejuvvon vuohččulaš bajásgeassindiehtagiid kandidáhtta Anni Saara Aikio. Su bargun lea sámegielat ja kulturvuđot nuoraidbarggu ovddideapmi sámeguovllu gielddain prošeaktaplána mielde ovttas sámedikki nuoraidráđiin ja prošeavtta stivrenjoavkkuin.

– Bargu orru hui miellagiddevaš. Munnje lea dehálaš, ahte sámenuoraide ordnejuvvojit doaimmat iežaset gillii ja ahte doaimmat vuođđuduvvet sin iežaset kultuvrii. Lea dehálaš sihke nannet sámenuoraid searvevuođa ja sámenuoraid identitehta ja gullevašvuođa dovddu. Háliidan leahkit mielde ovddideame sámenuoraid astoáiggedoaimmaid, muitala Anni Saara Aikio.

Prošeavtta doaimma geahččalit lágidit sámenuoraid sávaldagaid vuođul. Sávaldagaid čohkkejit jearahallanskoviin mii juhkkojuvvo Ijahis idja -festiválain. Jearahallamii sáhttá vástidit 8.9.2024 rádjái Ijahis Ijas lanserejuvvon neahttaskovi bokte. De! 2 – prošeakta sávváge, ahte nu máŋga sámenuora go vejolaš vástidivčče jearahallamii, vai nuoraide sáhttá lágidit miellagiddevaš doaimmaid miehtá sámeguovllu.

Ovdal dán De! 2-prošeavtta sámedikki nuoraidráđi De!-fidnu ollašuhttojuvvui áigodagas 1.10.2018-30.8.2019. De!-fitnu áigge ovddidedje nuoraid astoáiggedoaimmaid buot Suomas hubmojuvvon sámegielain. Prošeavtta ulbmilin lei maiddái movttiidahttit sámenuoraid ieža plánet makkár sámegielat astoáigedoaimmaide sii háliidivčče oassálastit. De!-prošeavttas kártejuvvui lassin dat, makkár sámegielat nuoraid doaimmaid iešguđet gielddat ja searvvit dien áigge lágidedje. Prošeavtta áigge ollašuhttojedje nuoraid plánen sámegielat astoáiggedoaimmaid pilohtat. Ulbmilin lei nannet sámegielat nuoraidkultuvrra ja movttiidahttit nuoraid geavahit sámegielaid maiddái astoáiggis. De!-fitnu ruhtadii Leader Pohjoisin Lappi.

Guokte jagi bisti De! 2-fidnui sámedikki nuoraidráđđi lea ožžon 46 500 € Lappi guovlohálddahusvirgedoaimmahagas. Prošeakta bistá guokte jagi ja nohká 2024 loahpas. Ovttasbargoguoibmin leat Sámi oahpahusguovddáš ja Nuoraidguovddáš Vasatokka.

Prošeavtta doaimma sáhttá čuovvut sosiála medias fitnu Instagram-siidduin, @de_astoaiggedoaibma. Doaimma birra dieđihuvvo maid nuoraidráđi sosiála mediain.