Paikallisuutiset

Buresveadjinguovllu sámegiela lávdegotti čoakkádus galgá válljejuvvot ođđasit

Davvi-Suoma hálddahusriekti lea mearridan, ahte Lappi buresveadjinguovllu sámegiela lávdegotti lahttun galget válljejuvvot sámegiela máhtti olbmot. Guokte lávdegotti lahtuin leaba almmuhan, ahte eaba máhte sámegiela, ja danin galget ođđa lahtut válljejuvvot. Dasa lassin dál várrelahtuin leat gávcci nissonolbmo ja vihtta dievddu, ja dát ii deavdde dásseárvolága gáibádusaid. Válljejumit galget dahkkojuvvot guovlostivrra čoahkkimis čakčamánus. Lappi buresveadjinguovllu guovloráđđehus lea mearridan bidjat johtui fálaldatgilvvu dálkkasautomáhtaid háhkamis jagiide 2024–2027. Háhkama árvun árvvoštallojuvvo leat 4,5 miljon euro. Dálkkasautomáhtat rávvejit áššehasaid váldit dálkasiid jeavddalaččat ja rievttes áigái. Automáhtat leat dál geavahusas gávcci báikegottis, ja dat leat geahpidan ruovttudivššu bargiid barggu ja buoridan dálkkassihkarvuođa. Dál buresveadjinguovlu viiddida dálkkasautomáhtaid geavahusa olles Lappii.

Bálkárehkenastimiid buresveadjinguovlu dahká das viidáseappot ieš. Guovloráđđehus mearridii, ahte buresveadjinguovlu álgá buvttadit bálkárehkenastinbálvalusaid iežas doaibman jagi 2025 álggu rájes. Bargit bálkáhuvvojit ja skuvlejuvvojit juo jagi 2024 áigge. Dán jagi bálkárehkenastimiid leat oastán Sarastia Oy:s. Rievdadusain geahččalit unnidit goluid ja sihkkarastit bálvalusa kvalitehta. Guovloráđđehus merkii diehtun bušeahttaraportta álgojagis gitta miessemánu loahpa rádjái. Bušeahttaraporta ii vel muital áibbas duohta dili buresveadjinguovllu ruhtadoalus, dannego earret eará áššehas- ja pasieantarehketčállimiin leat veahá ádjánan. Rehketčállimiid geahččalit oažžut áiggi dássái geassemánu rehketdollui. Guovloráđđehus vuođđudii máŋga virggi ja doaimma iešguđetge doaibmasurggiide. Ovdamearkka dihte vuođđudedje 17 psykologavirggi deavdin dihte borgemánus fápmui boahtti oahppi- ja studeantafuolahusa psykologadárbbuid. Hupmanterapevtta, veajuiduhttinrávvejeaddji, fysioterapevtta ja ergoterapevtta virggiid vuođđudedje golbma, ja maiddái guokte juolgeterapevtta virggi ja vihtta dikšunsuorggi vuosttašdikšuvirggi. Vuosttašdikšui vuođđudedje lassin maiddái veahkkeossodatdivššárvirggi ja guovddášbuohcceviesu bávččaspoliklinihkkii áššedovdidivššárvirggi. Teknihkalaš doibmii ásahedje mearreáigásaš prošeaktahoavdda virggi guovtti jahkái doaibmansaji inventeremiid várás.