Paikallisuutiset

Boaittobeal giliide lágidit čavčča áigge duodjegurssaid

Eanodaga guovllu Duodjebusse -prošeakta lea álgime dán čavčča duodjekurssaid bokte.

– Dán čavčča lágidit gurssaid aŋkke Njunnásis, Gárasavvonis ja Gilbbesjávrris, muitala prošeaktakoordináhtor Anne-Maret Labba.

Gárasavvonis riegádan Labba lea beassan prošeavttain bures johtui, dasgo son álggii bargui easka geassemánu álggus, ja sus lea 50-proseantta bargoáigi.

Prošeakta galggai loahpahuvvot dán jagi loahpas, muhto dál leat ráhkadeamen rievdadanohcama.

– Mis lei unna bottoš prošeavttas, ja sávvat ahte rievdadanohcamiin oččošeimmet lassiáiggi vel ovtta jagi bargat dáinna prošeavttain.

Vuorraset olbmuin lea goitge nu ollu diehtu ja máhttu, ahte mii háliidivččiimet sin maid mielde ja nu sii soitet juohkit iežadet máhtu nuorabuidda.

Kurssaid lágidit duodjáriid sávaldagaid mielde. Dás ovddosguvlui Labba sávvá, ahte olbmot livčče suinna oktavuođas iežaset sávaldagaiguin.

– Njunnásis áigot lágidit náhkkeboagángurssa, ja dohko lea vejolaš boahtit duddjot náhkkeboahkániid, muhto sáhttá maiddái vaikkoba bákkiidnai duddjot.

Labba muitala, ahte prošeavtta oktan váldoulbmilin lea dat, ahte nuorat beasaše oahppat árbevirolaš sámedujiid.

– Vuorraset olbmuin lea goitge nu ollu diehtu ja máhttu, ahte mii háliidivččiimet sin maid mielde ja nu sii soitet juohkit iežadet máhtu nuorabuidda.

Son aŋkke deattuha, ahte kursaáigi sáhttá leat maid servvoštallan ja ovttastallan.

Leat juo ollu plánat ovddasguvlui, eaige dat leat dušše kurssat giliin. Boahtime leat earret eará bálvalushábmenbargobádji, nuoraid leaira Anára nuoraid- ja luondduturisma Vasatokkas ja museamátki Johkamohkkái.

Labbain sáhttá váldit oktavuođa telefovnna bokte 040 6804 174 dahje e-poastta bokte annemaret.labba@samiduodji.com.