Paikallisuutiset

Áillahasluokta–Gilbbesjávri-gaskka áigot govddidit gávcci mehtera govdadin, barggut álget miessemánus

Riikkageainnu 21 divodit geasset osiid mielde.

Álggos galget divvut Áillahasluovtta ja Gilbbesjávrri geaidnogaskka, mii lea sullii njeallje kilomehtera gaska ja áigot govddidit luotta ja buoridit dan geometriijja. Barggut álget miessemánu loahpas ja gárvánit loahppajagi.

Väylävirasto prošeaktajođiheaddji Keijo Heikkilä mielde ođđa luotta govdodahkan šaddá gávcci mehtera.

– Geainnu divvumat sáhttet hehttet muhtin muddui johtolaga ja eandaliige luomuid áigge ferte ráhkkanit dasa ahte dán geaidnodivvungaskkain soaitá šaddat bisánastit ja vuordit, muittuha Heikkilä.

Geainnu buorideapmi ovdána maiddái Bálojohnjálmmi ja Jáhtona gaskka dál go leat ožžon dasa 30 miljovnna euro ruhtadeami.

Luoddaoasi guhkkodat mii galgá buoriduvvot lea sullii 30 kilomehtera. Väylävirasto dieđuid mielde divvun álgá áramusat loahppajagi. Agoartagilvu lea dál jođus ja agoartaváldi válljejuvvo miesse-geassemánu molsašumis. Agoartabargu gárváneažžá čakčat 2028.

Väylävirasto mielde riikkaviidosaš váldogeaidnofierpmádaga oassi, Valtatie 21 (Riikkageaidnu 21), lea dehálaš sihke Suoma fuolahussihkkarvuhtii ja lossajohtolahkii Davvi-Norgii ja Jiekŋamerrii.

Riikkageainnu 21 buoridandoaibmabijut leat mielde Väylävirasto investerenprográmmas jagiide 2035-2032. Goappašiid geaidnoprošeavttaid ulbmilin lea buoridit johtolatsihkkarvuođa ja johtolaga njuovžilvuođa.