Kolumnit

Muonion murtheela: Tavalinen ihminen on tyytyväinen, jos on rahaa niin, että tullee toihmeen

Ko ennen puhuthiin rikhaista ihmisistä, jokka tehit semmosta, mihin tavalisila ihmisillä ei ollu aikomusta eikä maholisuuttakhaan, sanothiin monesti, että ”sillä on millä mällätä” ja ”niilä on millä mällätä”. Ko luin aviisista kaks uutista, sanoinki ittekseni: niilä on millä mällätä.

Ensimäisen uutisen mukhaa mailman rikhain mies on nyt ranskalainen Arnaulin Penhartti. Sen omhaisuus on 171 miljartia tollaria. Sillä on millä mällätä. En ymmärä noin suuria lukuja niinkö en 13-vuotiihaana poikanakhaan ymmärtäny alkhuunkhaan sitä sotakorvauksen määrää, jonka Suomi joutu maksamhaan Neuvostoliitole vuona 1944. Miljooniahan soli seki. Soli vääryyksien vääryys, ko Neuvostoliittohan soan alotti, pommitti maata ja tappo paljon ihmisiä, ja site piti maksaa miljoonia. Ko luin tuon uutisen, ajattelin, että milthään tuntu tuomosta uutista lukea semmosen, joka kärsii rahapulasta ja puutheesta.

Voi hulluuven hulluutta! Joilaki on millä mällätä.

Samassa aviisissa kerrothiin Honkongissa järjestetystä auton erikoisrekisterikilvitten huutokauppa-myynistä. Siihen tulijan piti maksaa noin 600 euroa, että sai osalistua huutokauphaan. Kalheimasta kilvestä maksethiin yli 3 miljoonaa euroa! Mutta Tupaissa myythiin erikoisrekisterikilpi lähes 14 miljoonalla eurola! Kilvessä oli vain P7. Selvästi näky numero 7 ja P oli pienenä kilven yläosassa. Voi hulluuven hulluutta! Joilaki on millä mällätä.

Tavalinen ihminen on tyytyväinen, jos on rahaa sen verran, että tullee toihmeen. Jo nuorena jäi muisthiin Raamatun ”Älä köyhyyttä, älä rikkautta minulle anna; anna minulle ravinnoksi määräosani leipää, etten kylläisenä tulisi kieltäjäksi ja sanoisi ”Kuka on Herra?” ja etten köyhtyneenä varastaisi ja rikkoisi Jumalan nimeä vastaan” (Sananlaskut 30:8–9).

Siinäpä onki tosi viishaita ja hyviä neuvoja.

Peltoniemen Johanes