Paikallisuutiset

Pirita Näkkäläjärvi ON:in: AHR ođđaseamos mearrádusat loavkidit Suoma sápmelaččaid iešmearridanrievtti eamiálbmogin

Sámedikki ságadoalli Pirita Näkkäläjärvi oassálastá ON:id eamiálbmogiid bissovaš forumii (UNPFII) New Yorkas.

Foruma 23. čoahkkima temán lea eamiálbmogiid iešmearridanrievtti nannen ON:id eamiálbmogiid rivttiid guoski julggaštusa oktavuođas: eamiálbmogiid nuoraid jiena deattuheapmi.

Sámedikki ságadoalli Pirita Näkkäläjärvi doalai mánnodaga 15.4. sáhkavuoru, mas válddii ovdan Sámedikki válgalogahallamii laktáseaddji olmmošriekteloavkidemiid, ja čujuhii maiddái Alimus hálddahusrievtti (AHR) mearrádusaide lasihit 65 olbmo válgalogahallamii Sámedikki orgánaid mearrádusaid vuostá ja ordnet ođđasit jagi 2023 sámediggeválggaid.

– Suoma Sámedikki oaidnu lea čielggas. AHR ođđasamos mearrádusat loavkidit fas oktii Suoma sápmelaččaid iešmearridanrievtti eamiálbmogin ja riikkaidgaskasaš olmmošriektesoahpamušaid. Mii ávžžuhit Suoma divvut sámediggelága nu johtilit go vejolaččat olmmošriekteloavkidemiid loahpaheapmin, dajai Näkkäläjärvi sáhkavuorustis.

Näkkäläjärvi muitala, ahte olbmuid, geat eai deavdde jietnavuoigatvuođa kriteraid, lasiheapmi Sámedikki válgalogahallamii lea sápmelaččaid assimileren váldoálbmogii.

– AHR mearrádusat ledje beahttašupmi, dannego eamiálbmogiid assimilerenpolitihkka ii leat dálá áigi. Sámediggi ii goittotge áiggo vuollánit. Lei dehálaš beassat raporteret dilis ON:ide. Mii leat geatnegahtton sihke iežamet álbmoga ja buot máilmmi eamiálbmogiidda joatkit sápmelaččaid iešmearridanrievtti bealušteami, ságadoalli Näkkäläjärvi dadjá.

Sámedikki stivra áigu analyseret AHR mearrádusaid ja mearridit vejolaš joatkkadoaimmain maŋŋeleappos.

Sámedikki delegašuvdnii ON:id eamiálbmogiid bissovaš forumas gullet ságadoalli lassin riikkaidgaskasaš áššiid čálli Inka Saara Arttijeff. Dasa lassin nuoraidráđi ovddasteaddjin leat nuoraidráđi ságadoalli Rosa-Máren Juuso ja várreságadoalli Helmi Ljetoff. ON eamiálbmogiid forum lea bissovaš forum, ja dan bargun lea loktet eamiálbmogiidda guoski gažaldagaid earenoamážit ekonomalaš ja sosiálalaš ovdáneami, kultuvrra, birasgažaldagaid, skuvlejumi, dearvvašvuođa ja olmmošrivttiid suorggis. Bissovaš forum čoahkkinastá okte jagis ON:id váldobáikkis New Yorkas.