Paikallisuutiset

Sámedikki stivra doarju olmmošvuoigatvuođaváidaga dahkama válgalogahallama ja válggaid guoski áššis

Ságajođiheaddji Pirita Näkkäläjärvi cealká AHR maŋimuš čovdosiid loavkidit sámiid iešmearridanvuoigatvuođa eamiálbmogin.

Sámedikki stivra mearridii čoahkkimis doarjut dan, ahte stivralahtut ovttas vuolláičállet olmmošvuoigatvuođaváidaga ON:id olmmošvuoigatvuođakomiteai Sámedikki válgalogahallama ja válggaid guoski áššis, dieđiha sámediggi. Olmmošvuoigatvuođaváidda guoská mearrádusaid, maid alimus hálddahusriekti (AHR) lea njukčamánu loahpas addán Sámedikki válgalogahallamis ja sámediggeválggain. AHR mearridii dalle merket 65 olbmo Sámedikki mannan jagi válgalogahallamii Sámedikki orgánaid mearrádusaid vuostá ja ordnet sámediggeválggaid ođđasit.

Sámedikki ságajođiheaddji Pirita Näkkäläjärvi cealká, ahte Sámediggi bealušta eamiálbmotvuoigatvuođaid nannema guhkes linnjá dainna, ahte Sámedikki stivra doarju olmmošvuoigatvuođaváidaga.

– Dat lea oassin boatkanmeahttun ollisvuođa, mas lea gávnnahuvvon máŋgii, ahte Suopma loavkida riikkaidgaskasaš olmmošvuoigatvuođasoahpamušaid Sámedikki válgalogahallanáššis, Näkkäläjärvi dadjá.

ON:id olmmošvuoigatvuođakomitea ja nállevealaheami vuostásaš komitea (CERD) adde Supmii jagiin 2019 ja 2022 sivalažžan cealki čovdosiid sámediggelága dulkojumis ja geatnegahtte Suoma dárkkistit, ahte láhka gudnejahttá sámiid iešmearridanvuoigatvuođa.

Sámedikki mielde ON:id soahpamušbearráigeahččoorgánaide sáhttá dahkat oktagasváidagiid priváhtaolmmožin dahje priváhtaolbmuid jovkui gullevažžan, jos oaidná ahte lea loavkiduvvon ON:id olmmošvuoigatvuođasoahpamušain dahje daid válljenvuloš beavdegirjjiin dáhkiduvvon vuoigatvuođain.

– AHR maŋimuš čovdosat loavkidit sámiid iešmearridanvuoigatvuođa eamiálbmogin, dadjá ságajođiheaddji Näkkäläjärvi.

Sámedikki stivra mearridii čoahkkimis maiddái Sámedikki linnjemis girkočoahkkimii, ahte Sámediggi doarju bismmáidčoahkkima evttohusa lasihit njuolggadusa bálddalas náittosdilleáddejumiin girkoortnegii. Sámediggi hárjeha arvedávgepositiivvalaš politihka earret eará nu ahte sámedikki doaibmaprográmmas 2024–27 lea mearriduvvon arvedávgepolitihkalaš prográmma ráhkadeamis Sámediggái.

– Mii doarjut bismmáidčoahkkima evttohusa, daningo dan mielde buot párat sáhttet oažžut girkolaš vihaheami, muhto evttohus ii loavkit geange vuoigatvuođaid, dadjá Näkkäläjärvi.