Paikallisuutiset

Dálkkádatáššit, njoarosteapmi ja musihkka – Márjjábeaivvit ávvuduvvojit árbevirolaš vuogi mielde olles vahkkoloahpa

Sotnabeaivvi bismámeassuid maŋŋel almmuhuvvo Sámit girkus -prošeavtta antologiija, ja juo ovdal dilálašvuođa duorastateahkeda sáhttá oahpásmuvvat máhcahuvvon dujiide searvegoddeviesus.

Heahtá Márjjábeaivvit -vahkkoloahppa álgá Duottar-Sámi luondduguovddážis bearjadaga njukčamánu 21. beaivve, gos dii. 13 rájes almmustahttojuvvo sámi dálkkádatráđi Presaami 2 -fidnu loahpparaporta. Sámi dálkkádatráđđi lágida buohkaide rabas diehtojuohkin- ja ságastallandilálašvuođa mas ságastallojuvvo dálá ja vurdojuvvon dálkkádatrievdama váikkuhusain sámiid ruovttuguovllu dálkkádahkii, sámekultuvrii ja sámiid árbevirolaš ealáhusaide.

Bearjadaga sáhttá maiddái beaivet mannalit SámiSoster rs ordnen váffelkafeas Luovatupas, ja maŋŋelgaskabeaivve sáhttá čohkkedit Kino Hetta stullui geahččat K12-filmma Biru Unjárga. Kinoi lea nuvttá sisabeassan ja filbma lea tekstejuvvon suomagillii.

Eahkes ovcci rájes gitta golmma rádjái idjii sáhttá dánsut Lapland Hotealla Hettas, gos dánsunmusihkas vástida báikkálaš Riekko- orkeastar ja DJ Rospuutto. Bileahttavuovdin álgá dii. 21.00.

Lávvardaga njukčamánu 22. beaivve dii. 10-15 Eanodaga suohkan lágida Márjjábeivviid oktavuođas márkaniid njoarostangilvvu gilvobáikkis, mii lea Heahtá boares skuvlla giettis, gielddadálu ja K-Marketa gaskkas. Johtti Sápmelaččat -searvvi lágidan njoarostangilvvut álget lávvordaga dii. 12. Gilvvuin njoarostit lihkadeaddji stoalppuide, ja ovdal finála čađahuvvojit rátkimat. Gilvvus leat sierra luohkát dievdduide, nissoniidda, nieiddaide ja bártniide. Nuorat ja mánát njoarostit nuvttá. Bálkkašumiid juohkin dáhpáhuvvá gilvvuid maŋŋel.

Maiddái lávvordaga lea Luovatupas váffelkafea.

Dii. 18 Heahtá girkus lea searvegotti ordnen Giron Sámi Goarra -konsearta, ja dohko lea nuvttá sisabeassan.

Márjjábeaivvedánssat leat fas Lapland Hotealla Hettas, gos Sančuari čuojaha.

Sotnabeaivi njukčamánu 23. beaivve álggahuvvo diibmu 11 Márjjábeaivve bismmámeassuin Heahtá girkus. Meassuid maŋŋel boradeapmi searvegoddeviesus ja boradeami maŋŋel almmustahttojuvvo Sámi girkus -fidnu antologiija.

Ovdalgo sotnabeaivvi rádjái ollet, de lea vejolašvuohta juo duorastateahkeda álgit návddašit Márjjábeaidoaluin, dannego dalle searvegoddeviesus diibmu 18 dollojuvvo Máhcahuvvon duojit Heahtás -dilálašvuohta. Dan lágidit Siida Sámi musea ja luondduguovddáš. Dilálašvuohta lea nuvttá.